काँग्रेस अध्यक्षा सोनिया गांधी आणि काँग्रेस नेते राहुल गांधी (Rahul Gandhi) यांना नॅशनल हेराल्ड प्रकरणी ईडीने (ED) समन्स बजावलं आहे. मात्र सोनिया गांधी यांना कोरोनाची लागण झाल्याने त्या आज ईडी चौकशीला गैरहजर राहणार आहेत. त्यामुळे काँग्रेसने ईडीकडे चौकशीसाठी तारीख वाढवून देण्याची मागणी केली आहे.

काँग्रेसचे मीडिया प्रभारी रणदीप सुरजेवाला यांनी 1 जून रोजी मोदी सरकारवर राजकीय सूडबुद्धीचा आरोप केला होता. त्यांनी आरोप करत म्हटलं होतं की, सोनिया गांधी (Sonia Gandhi) आणि राहुल गांधी (Rahul Gandhi) यांनी ईडीने नोटीस बजावली आहे.

सोनिया गांधी यांनी 8 जून रोजी ईडीसमोर चौकशीसाठी हजर राहण्यासाठी समन्स बजावण्यात आला होता, त्यावर आर्थिक गैरव्यवहाराचे आरोप बिनबुडाचे असल्याचं काँग्रेसनं म्हटलं आहे.

सोनिया गांधी यांना 3 जून रोजी कोरोनाची लागण झाली. काँग्रेसच्या सूत्रांच्या माहितीनुसार, सोनिया गांधी यांच्या प्रकृतीत सुधारणा होत असली तरी त्यांचा कोरोना रिपोर्ट निगेटिव्ह आलेला नाही.

नॅशनल हेराल्ड प्रकरणी राहुल गांधी 13 जून रोजी ईडीसमोर हजर होणार आहेत. राहुल गांधी यांना 2 जून रोजी चौकशीसाठी समन्स बजाण्यात आलं होतं मात्र ते परदेशात असल्याने राहुल गांधी यांनी पुढची तारीख मागितली होती. ईडी सोनिया गांधी यांना चौकशीसाठी पुढील कोणती तारीख देतं हे पाहावे लागेल.

काय आहे ‘नॅशनल हेराल्ड’ प्रकरण?

‘नॅशनल हेराल्ड’ हे वर्तमानपत्र पंडित जवाहरलाल नेहरु यांनी सुरु केलं होतं. ते काँग्रेसचं मुखपत्र समजलं जायचं. काही काळानंतर हे वर्तमानपत्र बंद पडलं. मात्र, 2012 मध्ये काँग्रेस अध्यक्षा सोनिया आणि राहुल गांधी यांच्या ‘यंग इंडिया’ या कंपनीने या वर्तमानपत्राचे हक्क पुन्हा विकत घेतले. मात्र असं असलं तरी हे सुरु करण्यात आलं नव्हतं. हे हक्क घेताना 1600 कोटींची संपत्ती केवळ 50 लाखांत घेतल्याचा आरोप भाजप नेते सुब्रमण्यम स्वामी यांनी केला होता. त्या प्रकरणाची चौकशी सुरु आहे.